👉 အိမ်ခြံမြေ အရောင်းအဝယ်တစ်ခု ဖြစ်ဖို့အတွက် ဈေးညှိပြီးသွားပြီ၊ စာရွက်စာတန်း စစ်ဆေးပြီးသွားပြီဆိုရင်တော့ စရန်ချမဲ့ အဆင့်ကို ရောက်လာပါပြီ။

ဒီမှာ မေးစရာရှိလာတာက စရန်ငွေကို ဘယ်လောက်ပေးချေတာ သင့်တော်မလဲ ဆိုတဲ့မေးခွန်းပါ။ အရောင်း အဝယ်တစ်ခုနဲ့ တစ်ခုကတော့ တူညီတာမျိုးမရှိလို့ စရန်ငွေကို ဘယ်လောက်ချရမလဲဆိုတာကို ပုံသေပြောလို့ မရပါဘူး။

ယေဘုယျအားဖြင့်ကတော့ စရန်ချတာကို စတိစရန် နှင့် စရန်စာချုပ်ကြီးဆိုပြီး ၂ ပိုင်းခွဲပြီး ချုပ်တတ်လေ့ရှိကြပါတယ်။ စတိစရန်ဆိုတာကတော့ ဈေးဆိုင်လို့ အဆင်ပြေသွားပြီဆိုရင် သိန်း ၅၀ ကနေ သိန်း ၂၀၀ အတွင်းကို ပေးလေ့ပေးထ ရှိပါတယ်။ သဘောကတော့ အဆင်ပြေသွားတဲ့ ဈေးနဲ့ အရောင်းအဝယ်ကို Confirm ဖြစ်ပါတယ် ဆိုတာမျိုးပါ။ စရန်စာချုပ်ကြီးကတော့ အရောင်းအဝယ်ဖြစ်တဲ့ ဈေးနှုန်းရဲ့ ၂၀-၃၀ ရာခိုင်နှုန်းလောက်ကို ပေးတာပါ။ ဥပမာ သိန်း ၅၀၀၀ တန်တဲ့ ခြံဆိုရင်တော့ သိန်း ၁၀၀၀ လောက်ကို စရန်စာချုပ်ကြီးချုပ်ဆိုတဲ့ အခါ ပေးလို့ရပါတယ်။ တစ်ခြို့ကျတော့လည်း သိန်း ၄၀၀-၅၀၀ နဲ့ ချုပ်ဆိုတာမျိုးလဲ ရှိပါတယ်။

စတိစရန်မပေးဘဲ စရန်စာချုပ်ကြီးချုပ်ဆိုမယ်ဆိုရင်လဲ ချုပ်ဆိုလို့ ရပါတယ်။ စာရန်စာချုပ် မချုပ်ဆိုခင်မှာ စာရွက်စာတန်း မှန်ကန်မှု သေချာစစ်ဆေးဖို့ လိုပါတယ်။ ပြီးတော့ Payment Plan ကိုလဲ ရောင်းသူဝယ်သူ နှစ်ဦး နှစ်ဖက် သဘောတူတဲ့ စာချုပ်မျိုးဖြစ်ရပါမယ်။ ဘယ်အရစ်ကို ဘယ်အချိန်မှာ ဘယ်လောက်ပေးရမလဲ ဆိုတာကို စာချုပ်မှာ သေချာ ရေးသင့်ပါတယ်။

စရန်ချတဲ့အခါ ငွေကို နည်းနည်ဘဲပေးချေမယ်ဆိုရင် ရောင်းသူက ကိုယ့်ထက်ပိုပြီးပေးတဲ့သူရှိရင် သူက လက်ရှိစရန်ကို ပယ်ဖျက်ပြီး ငွေပိုပေးတဲ့ အဝယ်ကို ရောင်းနိုင်ချေရှိပါတယ်။ ဒါ့ကြောင့် စရန်ချတဲ့အခါ စရန်ကို အလွယ်တစ်ကူ ပယ်ဖျက်လို့ မရနိုင်တဲ့ ငွေပမာဏ တစ်ခုကို ပေးတာ ပိုပြီးသင့်တော်ပါတယ်။

ဝယ်သူအနေနဲ့ စာချုပ်ထဲမှာ မဖြစ်မနေထည့်ရမဲ့ ကိစ္စကတော့ ရောင်းခွန်ကို ရောင်းသူက ဆောင်ရပါမယ် (သို့) ဒီ အိမ်ခြံမြေနဲ့ ပက်သပ်ပြီး အရှုပ်အရှင်း တစ်ခုခုရှိပါက ရောင်းသူဘက်မှ အခကြေးငွေ ထပ်တောင်းခံခြင်းမရှိဘဲ အားလုံး ပြေလည်သွားတဲ့ အထိ တာဝန်ယူ ဖြေရှင်းပေးပါမယ်ဆိုတာမျိုးကို စရန်စာချုပ်ထဲမှာ ထည့်သွင်းရေးသားသင့်ပါတယ်။