👉 မြေကွက်တစ်ကွက်ကို ဝယ်တော့မယ်ဆိုရင် ဒီမြေကွက်က အနာဂတ်မှာ ပြန်လည်ရောင်းချဖို့ လွယ်လားခက်လားဆိုတာကို လေ့လာသုံးသပ်ဖို့ လိုပါတယ်။ ဒီ ပို့စ်မှာတော့ ပြန်ရောင်းရခက်တဲ့ မြေကွက်မျိုးတွေက ဘယ်မြေကွက်တွေ ဖြစ်မလဲ ဆိုတာကို ဆွေးနွေးသွားပါမယ်။

(၁) စာရွက်စာတန်း မသန့်တဲ့ မြေကွက်မျိုးတွေ

👉 အရပ်စာချုပ်တို့၊ ဂရန်းတုံးတို့ဆိုရင်တော့ ပြန်ရောင်းရခက်ပါတယ်။ ဝယ်သူတစ်ယောက်အနေနဲ့ ကြည့်မယ်ဆိုရင် ဒီမြေကွက်ကို ဝယ်လိုက်ပြီး ဆက်လုပ်ရမဲ့ အလုပ်တွေအရမ်းများနေတယ်ဆိုရင် မဝယ်ချင်ကြပါဘူး။ သဘောက သူများတကာရဲ့ အရှုပ်ထုတ်ကို ဘယ်သူမှ ပိုက်ဆံပေးပြီး ဆက်လက်ဖြေရှင်းဖို့ အားမသန်ကြပါဘူး။ စာရွက်စာတန်းကိစ္စတွေက လွယ်ကူတယ် ရိုးရှင်းတယ်ဆိုရင် အဝယ်တွေက ပိုပြီး အားသာကြပါတယ်။ ဂရန်ဂတုံးဆိုရင်တော့ ဆက်လုပ်ရမဲ့ ကိစ္စတွေကများတဲ့အတွက် အဝယ်တွေအနေနဲ့ အလုပ်ရှုတ်မခံချင်ကြပါဘူး။ ဘဏ်တွေကလဲ ဂတုံးဆိုရင် ချေးငွေမထုတ်ပေးတဲ့အတွက် စာရွက်စာတန်း မသန့်တဲ့ မြေကွက်တွေက ရောင်းရခက်တဲ့ မြေထဲမှာပါပါတယ်။

(၂) လမ်းဦးတိုက်၊ ပေါင်းချင်း ၄ တို့ ၁၃ တို့ဖြစ်နေတဲ့ မြေမျိုးတွေ

👉 အိမ်ခြံမြေဝယ်သူ တော်တော်များများက အလှည့်တို့ ပေါင်းချင်းတို့ကို သေချာ ချိန်ဆပြီးမှ ဝယ်ကြပါတယ်။ အယူမရှိတဲ့ အဝယ်တွေဆိုရင်တောင်မှ လမ်းဦးတိုက်နေတဲ့ မြေကိုဝယ်လိုက်ပြီး နောင်တစ်ချိန်ပြန်ပြီး ရောင်းမယ်ဆိုရင် ရောင်းရခက်တာမို့ မဝယ်ရဲ့ အနေအထားမှာ ရှိပါတယ်။

(၃) ဘေးကပ်ရပ်မှာ ကန်ထရိုက်တိုက်ရှိတဲ့ မြေမျိုးတွေ

👉 ဘေးကပ်ရပ်မှာ ကန်ထရိုက်တိုက်မြင့်ရှိတယ်ဆိုရင် ဒီမြေမှာ မိသားစုနေဖို့ အိမ်ဆောက်ဖို့ဆိုတာ တော်တော်လေးကို စဥ်းစားရမဲ့ အနေအထားမှာ ဖြစ်သွားပါတယ်။ တိုက်မြင့်ဘေးကပ်ရပ်မှာ အိမ်ဆောက်နေချင်တယ်ဆိုရင် စဥ်းစားရမဲ့ အချက်က တိုက်မြင့်ကနေ အမိုက်ပစ်ချတာတို့၊ လမ်းမြောင်ပိတ်ဆို့တာတို့၊ လမ်းပေါ်မှာ ကားတွေ ဖြစ်ကတတ်ဆန်း ရပ်ထားတာတို့ ရှိနိုင်ချေကို စဥ်းစားရပါတယ်။ ဒီလိုစိုးရိမ်စရာတွေ ရှိလို့ မိသားစုနေဖို့ ဆိုရင် တိုက်မြင့်ဘေးက ခြံကို မဝယ်ချင်ကြပါဘူး။ ကန်ထရိုက်တိုက် ဆက်ပြီးဆောက်မယ်ဆိုရင်တော့ အဆင်ပြေနိုင်ပါတယ်။